Amerika: Nyuma yo kwibwa intanga, yategetswe gutanga indezo z’umwana yabyaye atabizi.

0

Umuherwe wo muri Leta zunze ubumwe za Amerika, yatsinzwe urubanza ategekwa gutanga indezo ku mwana wavutse nyuma y’uko umugore ukora amasuku muri hoteli afashe intanga yari yasize mu gakingirizo akazitera.

Jane w’imyaka 40 usanzwe ukora amasuku muri hoteli ya Las Vegas yemereye urukiko ko atigeze aryamana n’uyu muherwe w’imyaka 28, ahubwo ko nyuma yo kubona agatubutse ku mpapuro zigaragaza umutungo w’uyu mugabo yahisemo kwitera intanga ze igihe yari agiye gukora isuku mu cyumba uwo muherwe yari yarayemo.

Yagize ati “Yasize impapuro za banki zigaragaza umutungo we ku meza mu cyumba cya hoteli nza kuzibona ubwo nakoraga isuku, icyo gihe nashakaga umwana cyane ndetse ntekereza ko byaba akarusho mbyaranye umwana n’umuherwe”.

Uyu mugore avuga ko nyuma yo gusanga intaga z’uyu mugabo mu gakingirizo, yaziteye akaza gutwita ubu akaba afite umwana w’umuhungu w’imyaka ine ndetse yanitiriye se.

Nyuma yo gukora ibizamini bya ADN ndetse bikemezwa ko umwana koko ari uw’uyu mugabo, urukiko rwamutegetse gutanga miliyoni 2$ nk’indezo y’igihe cy’imyaka itatu atakoze inshingano ze za kibyeyi ku muhungu we.

Nyuma yo guhabwa aka kayabo, Jane yahisemo kureka akazi ko gukora amasuku muri hoteli ahubwo atangiza ubucuruzi mu gihe abunganizi b’uyu muherwe mu by’amategeko bo bavuga ko umukiliya wabo ateganya kurega uyu mugore kuko yamwibye intanga.

TANGA IGITEKEREZO