Sano yasohoye indirimbo ihuye n’inkuru y’ibihe bya nyuma bye na Cadette

0

Sano Olivier ukora indirimbo zo kuramya no guhimbaza Imana yasohoye indirimbo nshya “He is able” ivuga ku ndunduro y’urukundo rwe na Uwera Carine [Cadette] rwagiyemo kidobya rugeze aharyoshye.

Sano yakundanye na Cadette kugeza ubwo yamwambitse impeta amusaba ko bazabana akaramata, nyuma bagiye mu murenge basezerana imbere y’amategeko.

Bitunguranye aba bahuriye kuri Facebook baje gutandukana biba inkuru ikomeye cyane ko Cadette yahamyaga ko Sano amwanze amaze kumucucura utwe twose.

Inkuru yo gutandukana kwa bombi yasakaye muri Kanama 2019. Benshi mu bakoresha imbuga nkoranyambaga barahindukiye batunga agatoki uyu musore usanzwe ari umuhanzi mu ndirimbo zo kuramya no guhimbaza Imana.

Uyu yashinjwaga kuba yarariye imitungo ya Cadette usanzwe atuye muri Leta Zunze Ubumwe za Amerika impapuro nk’ibimenyetso amajwi ndetse n’ibindi binyuranye yarifashishijwe ngo bishinje uyu muhanzi ku muga nkoranyambaga.

Sano si kenshi yakunze kuvuga kuri ibi byamubagaho, yahisemo kuryumaho. Inkuru zabaye nyinshi zigaruka kuri ubu buhemu yashinjwaga.

Sano yabwiye IGIHE dukesha iyi nkuru ko yahisemo guceceka kuko Imana yonyine ariyo ireba mu mitima yabo bityo akizera ko yo izi ukuri.

Muri ibi bihe niho yakuye indirimbo yise “He is able’’ ikubiyemo ubuhamya bw’ukuntu Imana yamweretse ko nta kintu gikomeye itashobora kugusimbukisha.

Sano yagize ati “Imana irakomeye kurusha ibintu byose, ibyo nanyuzemo byose narayitumbiriye kuko niyo imenya mu mutima w’umuntu uvuga we akavuga ibyo ashaka.”

Yavuze ko ibyo gutandukana na Cadette byemewe n’amategeko biri mu nzira zo kurangira.

Ati ”Sano wavuzwe ntabwo ariwe w’ukuri, ibyabaye byose nabifashe nk’isomo kandi iyo utumbiriye Imana ni byo by’ingenzi kurusha ibyo byose.”

Uyu muhanzi yavuze ko ibyavuzwe byose bitari ukuri, ati “Ugiye kuri Polisi na RIB wasanga nta modoka yanjye cyangwa ikirego cyanjye cyahageze.”

Yavuze ko hari ibintu byinshi yahimbiwe birimo ngo kuba yaratorotse igihugu n’ibindi byinshi gusa ahamya ko byahimbwe mu kumuharabika.

Abajijwe ikintu cyabayeho bagatandukana, Sano yavuze ko yarakaranyije na Cadette bitewe n’ibyo batemeranyagaho bityo bavuganye nabi umukobwa ahita abishyira ku mbuga nkoranyambaga bifata indi ntera birangira batandukanye.

Sano yavuze ko ibihe yanyuzemo yagiye abikomezwamo n’Imana yamubaye hafi, umuryango we, itorero asengeramo n’inshuti ze za hafi zamubaye hafi.

Yahishuye uko yababajwe bikomeye no kubona umubyeyi we yarinjijwe mu nkuru atanazi.

Uyu muhanzi yavuze ko hari abantu bamwiyitirira ku mbuga nkoranyambaga bagakora amakosa bityo akayitirwa kandi bidakwiye, yatanze urugero rw’umuntu usaba abakobwa amafaranga yamwiyitiriye.

Iyi ndirimbo ye nshya “He is able” ikubiyemo ubutumwa bw’ukuntu Imana yamubaye hafi muri ibi bihe bikomeye yabayemo mu gihe gishize.

Sano avuga ko Cadette atigeze amuguriza cyangwa ngo amuhe ideni runaka ku buryo yari kumwishyuza, ati “Ubuse impano yampaye nizo yanyishyuzaga? Ubuse buri wese wahaye umuntu impano bagatandukana ajye ahita azimusaba?”

Yavuze ko yatangiye gufata amashusho y’iyi ndirimbo ndetse hari n’izindi nyinshi azashyira hanze mu minsi iri imbere.

Usibye indirimbo nshya Sano yavuze ko afite ibitaramo binyuranye birimo n’icyo azakorera muri Afurika y’Epfo muri Werurwe 2020.

Umva hano indirimbo yise ”He Is Able”

Ivomo: igihe.com

TANGA IGITEKEREZO